വീട്ടുമുറ്റത്തോ ബാൽക്കണിയിലോ ഒരു മുല്ലച്ചെടി ഉണ്ടെങ്കിൽ ആ പരിസരമാകെ നല്ല സുഗന്ധം പരക്കും. പലരും വലിയ ആഗ്രഹത്തോടെ മുല്ലച്ചെടി (പ്രത്യേകിച്ച് കുടമുല്ല അഥവാ മോഗ്ര) നടുമെങ്കിലും കുറച്ചു പൂക്കൾ വിരിഞ്ഞ ശേഷം പിന്നീട് അത് പൂക്കാതാകാറുണ്ട്. ഇന്ത്യൻ കാലാവസ്ഥ മുല്ലച്ചെടികൾക്ക് ഏറ്റവും അനുയോജ്യമാണ്. എന്നാൽ കൃത്യമായ പരിചരണം നൽകാത്തതാണ് ഇവ പൂക്കാതിരിക്കാൻ കാരണം.
മുല്ലച്ചെടി എപ്പോഴും പച്ചപ്പോടെ ഇരിക്കാനും ധാരാളം പൂക്കൾ തരാനും സഹായിക്കുന്ന 5 പ്രധാന കാര്യങ്ങൾ ഇതാ:
മുല്ലച്ചെടികൾക്ക് നന്നായി സൂര്യപ്രകാശം ആവശ്യമാണ്. ദിവസവും കുറഞ്ഞത് 4 മുതൽ 6 മണിക്കൂർ വരെ നേരിട്ട് വെയിൽ ലഭിക്കുന്ന സ്ഥലങ്ങളിൽ വേണം മുല്ലച്ചെടി നടാൻ. ബാൽക്കണിയിലോ ടെറസിലോ വളർത്തുകയാണെങ്കിൽ ഏറ്റവും കൂടുതൽ വെയിൽ കിട്ടുന്ന ഭാഗത്ത് ചട്ടി മാറ്റിവെക്കുക. ആവശ്യത്തിന് വെയിൽ കിട്ടിയില്ലെങ്കിൽ ചെടി വളരുമെങ്കിലും പൂക്കൾ ഉണ്ടാകില്ല.
മണ്ണ് എപ്പോഴും ഈർപ്പമുള്ളതായിരിക്കണം, എന്നാൽ ചട്ടിയിൽ വെള്ളം കെട്ടിക്കിടക്കാൻ അനുവദിക്കരുത്. ചട്ടിയുടെ മുകൾഭാഗത്തെ മണ്ണ് ഉണങ്ങിയതായി കാണുമ്പോൾ മാത്രം നനയ്ക്കുക. വേനൽക്കാലത്ത് കൂടുതൽ വെള്ളം ആവശ്യമായി വരും. വെള്ളം കെട്ടിക്കിടന്നാൽ വേരുകൾ ചീഞ്ഞുപോകാൻ സാധ്യതയുണ്ട്.
മുല്ലച്ചെടിയിൽ കൂടുതൽ പൂക്കൾ ഉണ്ടാകാൻ ഏറ്റവും പ്രധാനപ്പെട്ടത് കമ്പു കോതൽ ആണ്. പൂക്കൾ വിരിഞ്ഞു കഴിഞ്ഞ ശേഷം ആ കമ്പുകളുടെ തലപ്പ് നുള്ളിക്കളയുക. കൂടാതെ ഉണങ്ങിയതും കേടുവന്നതുമായ കമ്പുകൾ കൃത്യമായി മുറിച്ചു മാറ്റണം. ഇങ്ങനെ ചെയ്യുമ്പോൾ പുതിയ ശാഖകൾ ഉണ്ടാവുകയും അതിൽ ധാരാളം പൂമൊട്ടുകൾ വരികയും ചെയ്യും
വെള്ളം എളുപ്പത്തിൽ വാർന്നുപോകുന്ന ഫലഭൂയിഷ്ഠമായ മണ്ണാണ് മുല്ലയ്ക്ക് ആവശ്യം. മണ്ണിൽ അല്പം മണലും ജൈവവളവും (ചാണകപ്പൊടിയോ കമ്പോസ്റ്റോ) ചേർത്ത് കൊടുക്കാം. ചെടി നന്നായി വളരാനും പൂക്കാനും മാസത്തിലൊരിക്കൽ ജൈവവളങ്ങളോ പൊട്ടാസ്യം, ഫോസ്ഫറസ് എന്നിവ അടങ്ങിയ വളങ്ങളോ നൽകുന്നത് നല്ലതാണ്.
മുല്ലച്ചെടികൾ ചിലത് പടർന്നു കയറുന്ന വള്ളികളായാണ് വളരുന്നത്. അതിനാൽ ഇവയ്ക്ക് പടരാൻ ആവശ്യമായ കമ്പുകളോ, കയറോ അല്ലെങ്കിൽ ചെറിയ നെറ്റുകളോ നൽകണം. വള്ളികൾ കൃത്യമായി കെട്ടിക്കൊടുക്കുന്നത് ചെടി ഭംഗിയായി വളരാനും കൂടുതൽ സൂര്യപ്രകാശം എല്ലാ ഭാഗത്തും ലഭിക്കാനും സഹായിക്കും. ഈ അഞ്ച് കാര്യങ്ങൾ ശ്രദ്ധിച്ചാൽ തുടക്കക്കാർക്ക് പോലും തങ്ങളുടെ വീട്ടിലെ മുല്ലച്ചെടിയിൽ നിന്ന് വർഷം മുഴുവൻ സുഗന്ധമുള്ള പൂക്കൾ നുള്ളാൻ സാധിക്കും.
