ഭൂമിയിൽ എന്തെങ്കിലും വലിയ ആണവയുദ്ധമോ പ്രകൃതിദുരന്തമോ വരാൻ പോകുന്നതിന് തൊട്ടുമുൻപ് ലോകത്തെ അതിസമ്പന്നന്മാർ എന്ത് ചെയ്യും? തീർച്ചയായും അവർ തങ്ങളുടെ അത്യാധുനിക സ്വകാര്യ ജെറ്റുകളിൽ കയറി സുരക്ഷിതമായ രഹസ്യ ബങ്കറുകളിലേക്ക് പറക്കും! ഇത്തരത്തിൽ ശതകോടീശ്വരന്മാർ തങ്ങളുടെ വിമാനങ്ങളുമായി കൂട്ടത്തോടെ നഗരങ്ങൾ വിടാൻ തുടങ്ങുന്നത് നിരീക്ഷിച്ച്, ഭൂമിക്ക് എന്തോ വലിയ ആപത്ത് വരാൻ പോകുന്നു എന്ന് പ്രവചിക്കുന്ന ഒരു കൗതുകകരമായ വെബ്സൈറ്റ് ഇപ്പോൾ ഇന്റർനെറ്റിൽ തരംഗമാവുകയാണ്.
കമ്പ്യൂട്ടർ പ്രോഗ്രാമറും ആർട്ടിസ്റ്റുമായ കെയ്ൽ മക്ഡൊണാൾഡ് വികസിപ്പിച്ചെടുത്ത 'അപ്പോക്കലിപ്സ് ഏർലി വാണിംഗ് സിസ്റ്റം' (Apocalypse Early Warning System) എന്ന വെബ്സൈറ്റാണ് അന്താരാഷ്ട്ര മാധ്യമങ്ങളിൽ ഇപ്പോൾ വലിയ ചർച്ചയായിരിക്കുന്നത്. കോടീശ്വരന്മാരുടെ വിമാനങ്ങളുടെ ചലനങ്ങൾ തത്സമയം വിലയിരുത്തി ഒരു 'ലോകാവസാന' അലേർട്ട് നൽകുകയാണ് ഈ സിസ്റ്റം ചെയ്യുന്നത്.
ഈ വെബ്സൈറ്റ് പൂർണ്ണമായും വിമാനങ്ങളുടെ സഞ്ചാരം തത്സമയം നിരീക്ഷിക്കുന്ന 'ADS-B' (Automatic Dependent Surveillance-Broadcast) ഡാറ്റാ സംവിധാനത്തെയാണ് ആശ്രയിക്കുന്നത്. ലോകമെമ്പാടുമുള്ള പതിനൊന്നായിരത്തോളം കോർപ്പറേറ്റ്-സ്വകാര്യ വിമാനങ്ങളുടെ വിവരങ്ങൾ ഈ സിസ്റ്റത്തിൽ ലഭ്യമാക്കിയിട്ടുണ്ട്. സാധാരണ ദിവസങ്ങളിലെ വിമാന സർവീസുകളുടെ ശരാശരി കണക്കുകളുമായി ഇപ്പോഴത്തെ തത്സമയ ഡാറ്റയെ ഈ സിസ്റ്റം താരതമ്യം ചെയ്യുന്നു. ഏതെങ്കിലും പ്രത്യേക സമയത്ത് കോടീശ്വരന്മാരുടെ സ്വകാര്യ ജെറ്റുകളുടെ യാത്രകളിൽ അസ്വാഭാവികമായ വർദ്ധനവ് (Spike) ഉണ്ടായാൽ, വെബ്സൈറ്റ് അതിന്റെ 'അലേർട്ട് ലെവൽ' ഉയർത്തും.
എന്നാൽ ഒരു വലിയ കായിക മാമാങ്കം നടക്കുമ്പോഴോ, പ്രധാന അവധിക്കാലങ്ങളിലോ, അല്ലെങ്കിൽ സാങ്കേതിക തകരാറുകൾ മൂലമോ വിമാനങ്ങളുടെ എണ്ണത്തിൽ വർദ്ധനവ് ഉണ്ടായാലും ലെവൽ 5 കാണിച്ചേക്കാം എന്ന് ഇതിന്റെ നിർമ്മാതാവ് വ്യക്തമാക്കുന്നുണ്ട്. അതിനാൽ ഇത് പൂർണ്ണമായും കൃത്യമായ ഒരു പ്രവചനമായി കാണാൻ സാധിക്കില്ല.
ആഗോള കാലാവസ്ഥാ വ്യതിയാനം, പുതിയ പകർച്ചവ്യാധികൾ, അല്ലെങ്കിൽ ആണവയുദ്ധ ഭീഷണികൾ എന്നിവ ഉണ്ടായാൽ ലോകത്തെ അതിസമ്പന്നന്മാർക്ക് രക്ഷപ്പെടാൻ രഹസ്യ താവളങ്ങളും വലിയ ആഡംബര ബങ്കറുകളും ഉണ്ടെന്നത് പരസ്യമായ രഹസ്യമാണ്. ഗൾഫ്സ്ട്രീം ജി700, ബോംബാർഡിയർ ഗ്ലോബൽ 7500 തുടങ്ങിയ അത്യാധുനിക സ്വകാര്യ ജെറ്റുകൾക്ക് ഇന്ധനം നിറയ്ക്കാതെ തന്നെ ഏഴായിരത്തിലധികം നോട്ടിക്കൽ മൈൽ ദൂരം സഞ്ചരിക്കാൻ സാധിക്കും. വലിയൊരു ദുരന്തമുണ്ടായാൽ പ്രധാന ധനകാര്യ നഗരങ്ങളിൽ നിന്ന് വിദൂര ദ്വീപുകളിലേക്കോ മലനിരകളിലെ ഒളിത്താവളങ്ങളിലേക്കോ അതിവേഗം പറക്കാൻ ഇവർക്ക് സാധിക്കും. സമ്പന്നരുടെ ഈ 'സർവൈവലിസം' പ്രവണതയെ പരിഹസിക്കുന്ന ഒരു സോഷ്യൽ സറ്റയർ കൂടിയാണ് ഈ വെബ്സൈറ്റെന്ന് കെയ്ൽ മക്ഡൊണാൾഡ് വ്യക്തമാക്കുന്നു.
ഈ വെബ്സൈറ്റിന്റെ വരവോടെ പ്രമുഖരുടെ സ്വകാര്യ വിമാനങ്ങൾ നിരീക്ഷിക്കുന്നത് വീണ്ടും വലിയ വിവാദങ്ങൾക്ക് വഴിതുറന്നിട്ടുണ്ട്. ഇലോൺ മസ്ക് ഉൾപ്പെടെയുള്ള പ്രമുഖരുടെ വിമാനങ്ങൾ ട്രാക്ക് ചെയ്യുന്നത് വലിയ സുരക്ഷാ ഭീഷണിയാണെന്ന് മുൻപും ആരോപണങ്ങൾ ഉയർന്നിരുന്നു. വ്യക്തിഗത സുരക്ഷയും വിപണിയിലെ സുതാര്യതയും തമ്മിലുള്ള തർക്കങ്ങൾ ഈ പുതിയ ഡൂംസ്ഡേ പ്രവചന വെബ്സൈറ്റോടെ വീണ്ടും സജീവമായിരിക്കുകയാണ്. എങ്കിലും വിനോദത്തിനും കൗതുകത്തിനുമപ്പുറം, സമ്പന്നരുടെ നീക്കങ്ങളെ നിരീക്ഷിക്കുന്നതിൽ സാധാരണക്കാർക്കുള്ള താല്പരര്യമാണ് ഈ വെബ്സൈറ്റിന്റെ ജനപ്രീതിക്ക് കാരണം.
